ភ្នំពេញ៖ សម្តេចតេជោ ហ៊ុន សែន អំពាវនាវឱ្យមានការយកចិត្តទុកដាក់ខ្ពស់លើសុវត្ថិភាព អនាម័យចំណីអាហារ ក្នុងឱកាសបុណ្យចូលឆ្នាំថ្មី ប្រពៃណីជាតិដែលខិតជិតដល់ខាងមុខនេះ ជាពិសេសអុ្នកលក់អាហារតាមដងផ្លូវ ដោយត្រូវរក្សាអនាម័យខ្ពស់។

ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យបៀលប្រាយ ព្រឹកថ្ងៃទី១៦ ខែមីនា ឆ្នាំ២០២៣នេះ ឱ្យដឹងថាអំឡុងពេលចូលឆ្នាំប្រពៃណីជាតិខ្មែរខាងមុខនេះនឹងមានភ្ញៀវទេសចរជាតិ និង អន្តរជាតិច្រើនធ្វើដំណើរកំសាន្ត ដូចនេះសម្តេចអំពាវនាវឱ្យយកចិត្តទុកដាក់ខ្ពស់លើសុវត្ថិភាពចំណីអាហារ។

សម្តេចមានប្រសាសន៍ថា៖ «អំពាវនាវឱ្យមានការយកចិត្តទុកដាក់ទៅលើសុវត្ថិភាពចំណីអាហារ តាមហាងតូច ហាងធំ ប៉ុន្តែសំខាន់ជាងគេគឺអ្នកលក់តាមដងផ្លូវ និងកន្លែងតូចតាច»។

ជាមួយគ្នានេះដែរ សម្តេចក៏បានណែនាំឱ្យក្រសួងទេសចរណ៍ និងក្រសួងសេដ្ឋកិច្ច សហការកំណត់ឱ្យអ្នកលក់ដូរ ជាពិសេសអ្នកលកើតាមដងផ្លូវ លក់ដូរតូចតាច ឱ្យដាក់ផ្លាកតម្លៃលើចំណីអាហារ ដើម្បីឲ្យអ្នកទិញទាំងជនជាតិខ្មែរ ជាពិសេសជនបរទេសងាយស្រួលក្នុងការទិញ ខណៈសម្តេចវាយតម្លៃថាក្នុងឆ្នាំនេះទេសចរអន្តរជាតិនឹងកើនឡើងជាង៤.៥លាននាក់។

គួរឱ្យដឹងដែរថា បុណ្យចូលឆ្នាំថ្មីប្រពៃណីជាតិខ្មែរ នឹងត្រូវរៀបចំឡើងរយៈពេល ៣ថ្ងៃ ចាប់ថ្ងៃទី១៤-១៦ ខែមេសា ឆ្នាំ២០២៣ ដែលជារៀងរាល់ឆ្នាំតាមបណ្តាខេត្តនានាក្នុងកម្ពុជា តែងតែរៀបចំសង្ក្រាន្តប្រចាំខេត្តនីមួយៗ ដោយមានការប្រជាជនជួបជុំគ្នាច្រើនកុះករ លេងល្បែងប្រជាប្រិយ ក៏ដូចជារាំចង្វាក់ប្រពៃណី ព្រមទាំងមានស្តង់ឬ តូបលក់ដូរផងដែរ៕